Nangipaay ti Department of Social Welfare and Development (DSWD) iti nasurok ₱8.4 million a balor iti humanitarian aid kadagiti lokal a gobyerno idiay Albay a naapektaran iti pangta iti panagalburoto ti Bulkang Mayon.
Sigun kenni DSWD-Disaster Response Management Group (DRMG) Assistant Secretary Irene Dumlao,agtultuloy ti panangipaayda iti tulong para kadagiti naapektaran a pamilya nangruna dagiti adda ita kadagiti evacuation centers.
Kinuna ni Dumlao a nainget ita nga imonmonitor ti Field Office (FO) 5 – Bicol Region ti kasasaad dagiti nasurok 1,100 a pamilya a buklen iti nasurok 4,000 nga indibidwal nga agtaltalinaed kadagiti 12 nga evacuation centers iti nasao a probinsya.
Kabayatanna, malaksid iti relief assistance, mangipaay metlaeng ti nasao nga ahensya iti cash-for-work (CFW) kadagiti naapektaran tapno maaddaan dagitoy iti temporaryo a pagpataudan ti pamastrekan bayat nga agtultuloy pay ti pangta ti panagbettak iti nasao a bulkan.
