Inruaren ti Department of Trade and Industry (DTI) ti price guide para kadagiti school supplies iti masungad a panaglukat ti klase inton Hunio.
Sigun iti nasao nga ahensia, nababa ti presio dagiti dadduma nga school supplies tapno adda ti pagpilian dagiti nagannak ken estudiante.
Ti presio ti uppat a notebook ket nakessayan iti nagbaetan ti P5.00 agingga iti P10.00; para iti 24 a pad paper, naibaba ti presio iti nagbaetan ti P1.00 agingga iti P6.00; ken ti maysa a pidaso ti lapis ket nalaklaka itan iti P5.00.
Gapu iti dayta, ti gatad ita dagiti notebook ket manipud P15.00 agingga iti P52.00, aggatad met ti pad paper manipud P15.00 agingga iti P48.75, ken aggatad dagiti lapis iti P11.00 agingga iti P24.00.
Kabayatanna, dagiti met presio ti ballpen, erasers, ken sharpeners ket saan a nagbaliw.
Dagiti ballpen wenno lapis ket aggatad manipod iti P3.00 agingga P33.00, sharpeners ket manipod iti P15.00 agingga P69.00, ken ti erasers ket aggatad met ti P4.50 agingga P20.00.
Dadduma nga school supplies a kas ti crayons ket aggatad iti nagbaetan ti P12.00 agingga P114.00, bayat a ti rulers ket magatang manipod P16.00 agingga P39.00.
Nagpalagip ti nasao nga ahensia iti publiko nga agannad nu gumatang kadagiti school supplies.
Kasapulan a sukimaten dagiti gumatgatang dagiti label ti produkto, sigun kenni Department of Trade and Industry Secretary Cristina Roque.
