BAGUIO CITY – Sumangsangon iti kaso a panaglabsing iti RA 9165 wenno Comprehensive Dangerous Drugs Act of 2002 ti dua nga indibidual kalpasan a natiliw dagitoy iti buy-bust operation sadiay Bakakeng Norte/Sur Barangay, Baguio City idi kalman.
Nabigbig dagitoy a da Romel Fontanilla Mabalot alyas Choy, 38-anyos, residente ti Loakan Proper, Magsaysay Baguio City ken Marjorie Lutis Ticuan, 29-anyos, tubo ti Kabayan, Benguet, residente ti Phase 1, Purok 10, Bakakeng, Baguio City.
Maibasar iti rekord dagiti otoridad, ni Mabalot ket maysa a High Value Individual bayat a ni Ticuan ket maysa nga Street Level Individual a karaman iti Regional Top 10 Drug Personalities ti Cordillera.
Nakumpiskar kadagitoy ti lima a pakete ti maatap a shabu nga agdagsen ti agarup nasurok 21 grams nga addaan Standard Drug Price a P142,800.
Narekober met kadagitoy ti naaramat a buy-bust money.
Nakumpiskar pay ti cellphone ken lugan nga inaramatda a nakitransaksion kadagiti operatiba.
Sigun pay kadagiti otoridad, karaman ni Mabalot iti nagduduma nga aktibidad ti iligal a droga ken natiliwen daytoy idi 2016 ngem nawayawayaan.
Nupay kasta, intuloyna dagiti iligal nga aktibidadna iti iligal a droga a rason iti panakairamanna iti COPLAN DELTA a tinutukan ti pulisya.
Kabayatana, maatap met a ginuyugoy ni Mabalot ni Ticuan nga agilako ti iligal a droga.
Daytoy ti kaunaan a panagilako ni Ticuan iti iligal a droga.
