Inwaragawag ti Presidential Anti-Organized Crime Commission (PAOCC) a financier ken operator ti sumagmamano nga scam farm, pakairamanan ti naraut a Philippine offshore gaming operators (POGO) hub sadiay Porac, Pampanga dagiti dua a ganggannaet a nakemmeg iti exclusive subdivision sadiay Tuba, Benguet itay laeng nabiit.
Sigun kenni Gilbert Cruz, executive director Undersecretary ti Presidential Anti-Organized Crime Commission (PAOCC), konektado ti Cambodian national a ni Sun Liming iti operasion ti Lucky South 99 a rinaut dagiti pannakabagi ti linteg, gapu iti human trafficking ken dadduma pay nga illegal nga aktibidad.
Malaksid iti dayta, ni Sun ti nangaramid iti Liming.com maysa a financial platform nga inusar dagitoy a mangallilaw kadagiti investors.
Sigun kadagiti maseknan nga otoridad, immunan a naglibas ni Sun iti pagilian ken nagusar iti sabali a pakabigbigan kadagiti ilegal nga aktibidad daytoy.
Maipalagip a naarestar ni Sun ken ti babae a Chinses a ni Wang Keping, 35, babaen kadagiti agents ti Presidential Anti-Organized Crime Commission (PAOCC) ken Bureau of Immigration (BI) intelligence division idi Sabado, Hulio 27, iti agdama a tawen.
