BAGUIO CITY – Impakaammo ti Armed Forces of the Philippines (AFP) a nasuspendir dagiti dua a kadete ti Philippine Military Academy gapu iti maatap a pannakairamanda iti insidente ti hazing.
Sigun kenni AFP spokesperson Col. Francel Margareth Padilla, manipud kadagiti uppat a kadete a mapapati a karaman iti insidente ti hazing ket dua ti nasuspendir, maysa ti naabsuwelto bayat a maysa ti naipaayan iti kaskenan a pannusa kas paset ti chain of command.
Maibasar iti imbestigasyon ti Baguio City Police, ti biktima ket 4th class cadet ken maatap a nakapasar iti pisikal a panagabuso ken pannakaibabain iti namin-ado a daras sipud pay idi Setyembre 2 agingga Setyembre 29, 2024.
Imbilang ti biktima ti pannakaabusona kas “animalistic tripping,” pakairamanan ti maatap a pannakadandanogna ken nalabes a training.
Gapu iti daytoy, naospital ti kadete idiay Quezon City kalpasan a napukawan iti puot gapu iti napigsa a pannakadanogna nu sadino ditoy a naipasidong iti medical ken psychological treatment.
Nakaruar ti biktima iti ospital idi Hunyo 30, 2025.
Sigun met iti pannakiuman ti Bombo Radyo kenni Jesse Nestor Saludo, Chief-Public Affairs Office, PMA, saan a maibilang a hazing ti napasamak gapu ta saan a pasok daytoy iti legal definition ti Anti-Hazing Act.
Inlawlawagna a dagiti sugat a nasagrap ti biktima ket gapu iti aramid dagiti kaklasena a nangiruar iti pannakadismayada gapu iti performance daytoy.
Nupay kasta, ur-urayen pailaeng ti Philippine Military Academy ti pormal a reklamo ken report manipud iti pulisya.
