Binabalaw ti dua a kameng ti House of Representatives ti kinuna ni sigud a President Rodrigo Duterte a panangpapatay kadagiti sangapulo ket lima a senador, ken kinunada a ti kapada a balikas ken angaw ket saan a normal nga aramiden.
Sigun kenni Lanao del Sur 1st District Representative Zia Alonto Adiong, nu mabalin a makemmeg dagiti ordinario a tattao gapu iti panagang-angawda iti bomba, ngarud kasta met koma ti maaramid kadagiti tattao a nangatngato ti saadna wenno dakkel ti impluwensiana.
Maipalagip a bayat ti PDP-Laban proclamation rally, kinuna ti sigud a President Duterte a kasapulan a mapapatay dagiti senador tapno mabakantean ti Senador, ken tapno makastrek dagiti amin nga inyerdorsona.
Indepensa met ti kaalyadona a ni Senador Ronald “Bato” Dela Rosa a ti kinuna ni Duterte ket angaw laeng.
Binabalaw metlaeng ni Adiong ti kinuna ni National Bureau of Investigation (NBI) Director Jaime Santiago a “political rhetoric” laeng ti kinuna ni Duterte.
