Dua a kaso itan iti firecrackers-related injuries ti nailista iti Baguio City Health Services Office sumagmamano nga aldaw sakbay ti Paskua.
Kinumpirmar daytoy ni Health Services Office head Dr. Celia Flor Brillantes ita laeng na aldaw.
Iti panakiuman iti Bombo Radyo kenni Dr. Brillantes, ti umuna a kaso ket maysa ng agtawen iti 11 a lalaki a nagsagrap iti first-degree burn iti makannawan a tangan(thumb) daytoy.
Napasamak ti insidente alas sais iti sardam (6PM) idi Domingo nu sadino, ti nasao nga ubing ti mismo a nagpaputok iti maiparit a palibang partikular ti five star.
Ti maikadua a kaso a napasamak idi kalman ket ti agtawen iti 12 a lalaki a nagsagrap met iti second-degree burn iti kannigid a takyagna ngem saan pay a nabigbig ti klase ti paputok a naaramat.
Iti agdama, awan pay ti nadakamat seknan iti nagtaudan dagiti paputok.
Maipalagip a nainget nga ipawpawil dagiti otoridad iti Baguio City ti panaglako ken panagaramat iti palibang gapu iti risgu nga ituntunda daytoy saan laeng a kadagiti agar-aramat nu di ket uray kadagiti bystanders ken passersby.
Gapu iti dayta,kidkiddawen ti opisyal a nasaysayaat nu makitinnulong dagiti ubbing ken dadakkelda iti panakabigbig ti nagtaudan dagiti palibang tapno saanen a manayonan ti firecrackers-related injuries iti siudad.
Iti baet dayta, mapalubusan latta ti panakaisayagkat iti community fireworks display laketdi dimmalan iti umno a proseso,pinatgan dagiti maseknan nga otoridad,ken ti operasyon ket aramiden dagiti propesyunal.
Kabayatanna, manamnama met a maaddaan iti fireworks display ti Baguio City kagiddan ti panagsarabo iti 2026 gapu ta nangisagana ti lokal a gobyerno iti programa para iti New Year’s Countdown idiay Melvin Jones Grandstand.//Bombo Rob Dominguez
