BAGUIO CITY – Pimmusay ti dua a lalaki kalpasan a natnag ti kotseda iti irrigation canal sadiay Tabuk Kalinga, Barangay New Tanglag idi kalman.
Nabigbig dagiti pimmusay a ni Gerald Tomas Gagelonia, maysa a nurse iti Kalinga Provincial Hospital, ken Marlon Agnaya, agtatrabaho iti Kalinga Provincial Capitol.
Dagiti dua ket nasarakan iti Nissan Almera a nailumlom iti irrigation canal pasado alas 5:20 tattay agsapa.
Naipan dagiti bangkay dagiti dua iti TAMPCO Funeral Care idinto a naitaray iti Traffic Management Unit ti lugan para iti temporary custody.
Maibasar iti imbestigasyon ti Tabuk City Police Station, pasado alas 11:49 ti malem idi naglugan da Gagelonia ken Agnaya iti kotse ken nagsardengda iti nasurok 20 a minuto sakbay a nagmanehoda nga agturong iti Bulanao manipud iti Barangay Masablang.
Sigun met ti maysa a residente a makinbagi ti balay a nagdiswan ti lugan napasamak daytoy nga insidente idi alas 12:30 ta nariing daytoy gapu ti kinapigsa ti ta-ul dagiti aso na.
Dagus a rimwar garod daytoy ngem awan ti nakita na.
Kabayatanna, idi agsapa ket nasarakan ti lugan iti irrigation canal.//MNS
