Pimmusay ti dua nga indibidual idiay Camp 4, Tuba, Benguet itay nabiit kalpasan a nagaburan dagitoy iti batbato ken pitak gapu iti rockslide ken mudslide idi Agosto 19.
Dagiti biktima ket lallaki nga agtawen iti 23 ken 24, agpada a minero ken residente ti nadakamat a lugar.
Maibasar iti report ti kapulisan, impeksa ti lalake nga agtawen iti 44 a maysa metlaeng a minero, iti interview dagiti kapulisan nga agsapa idi Agosto 19, nagturong dagitoy iti creek kaduana dagiti dua a biktima.
Nagbati met ti lalaki iti kampoda nga agarup 80 metro ti kaadayna manipud iti creek tapno agluto iti pangaldawda.
Agarup ala-una iti isu metlaeng nga aldaw idi nagdesisyon daytoy nga apanna kitaen dagiti kakaduana.
Nupay kasta, apaman a nakasangpet daytoy iti nasao a disso, nadiskubrena ti napasamak a rockslide ken mudslide.
Dagos met a nagpatulong daytoy tapno masapul dagiti dua a biktima.
Agarup alas-tres ti malem idi nagretrieve da ti bagi dagiti dua a biktima babaen kadagiti kakabagyan dagitoy nga awanen ti biyag dagiti biktima ken naiturong ti bagi dagiti biktima iti bukod da a pagtaengan iti alas-kuwatro ti malem para iti pannakabantay dagitoy.
Saan metten a naipasidung iti otopsiya ti bangkay dagiti dua a biktima.
Kabayatanna indeklara ti doktor iti medical assessment babaen iti videocall nga asphyxiation secondary to being buried by landslide ti rason ti ipupusay ti lalaki nga agtawen iti 23 bayat a traumatic brain injury gapu iti landslide met ti rason ti ipupusay ti lalaki nga agtawen iti 24. // via Bombo Noveh Organo
