Addan iti nasayaat a kasasaad ti dua a Minor de Edad a naaksidente idiay Badiwan, Publacion Tuba, Benguet iti 4:45 PM ita nga aldaw, May 07, 2025.
Maibasar iti inistial nga imbestigasion, naidungpar ti motor a nagluganan dagiti biktima iti Van kalpasan a saanda a nadlaw a pasalog daytoy.
Gapu iti dayta, naipurwak dagiti biktima iti kalsada a nangitunda iti pannakadangran dagitoy.
Dagus met a naiturong dagiti biktima iti pagagasan babaen iti panagresponde dagiti medical team ken kameng ti polisia.
Iti interview iti Bombo Radyo iti Personnel ti Tuba Municipal Police Station, kinunana a saan a rehistrado ti inaramat dagitoy a Motorsiklo ken ti back rider laeng ti addaan iti helmet.
Nagtaud dagiti biktima iti Delia Prime Subdivision.
Kabayatanna, posible a maisayangkat ti “Tongtongan” iti nagbaetan ti driver ti van ken dagiti biktima agsipudta agi-innammo dagitoy ken awan ti maipila a kaso kontra iti driver ti Van.
Dagiti dua a biktima ken ti driver ti nasao a lugan ket manipud metlaeng idiay Tuba, Benguet.//Via Bombo Genzel Depayso
