BAGUIO CITY – Naipabuya ti dua a multi-awarded documentary films ti filmmaker/actor/writer manipud Abra a ni Dexter Macaraeg iti Sinehan sa Konsuldado ti Consulate General of the Philippines sadiay Frankfurt, Germany a paset ti panakarambak ti Buwan ng Wikang Pambansa.
Naipabuya ti pelikula a napauluan ti ‘Am-Amma’ ken ‘Tata Pilo’ a nakaitampokan ti kultura ti Abra.
Tampok iti pelikula nga ‘Am-amma’ ti weaving traditions dagiti Tingguian sadiay Abra ken naipamaysa ti istorya kenni Norma Agaid-Mina manipud Peñarrubia a maysa kadagiti mabigbigbig a loom weavers ti Abra.
Tampok met iti pelikula a ‘Tata Pilo’ ti pakaistoryaan ni Teofilo Garcia manipud San Quintin a maysa a National Living Treasure Awardee gapu iti didikasyon daytoy iti tradisyonal a panagaramid ti kallugong a naaramid iti tabungaw a maaw-awagan ti ‘kattukong’.
Dinar-ayan ti dumanon 35 a miyembro ti Filipino-German community sadiay Frankfurt ti panakaipabuya dagiti nasao a documentary films.
Nangisayangkat metlaeng ni Macaraeg iti film lecture and symposium ken ditoy nga impettengna ti kinapateg ti cinematography kagiddan ti panangital-o-na iti nagduduma a nainsigudan a produkto ti Abra.
