Pimmusay dagiti dua a Philippine Force personnel kalpasan a nagswek ti nagluganan dagitoy a SF-260 trainer aircraft idiay Cabuyao, Poblacion, Tuba, Benguet ita nga aldaw, Mayo 20.
Dagiti nasao a personnel ket nabigbig a da First Lieutenant Ruth Angelique R. Pasos PAF, 28-anyos ken ti 25-anyos a ni Second Lieutenant Cherky E. Embudo PAF.
Kinumpirmar daytoy ti Philippine Air Force babaen iti statement nga inpablaak dagitoy iti official page da.
Sigun iti impormasyon a nakalap ti Bombo Radyo Newsteam, dead on arrival dagiti biktima a dagos a naitaray idiay Baguio General Hospital and Medical Center (BGHMC).
Immunan a naipadamag nga unconscious dagitoy sakbay a naitarayda idiay ospital.
Iti ummuna a report manipud kadagiti otoridad, nagresponde dagiti kameng ti Tuba Municipal Police Station kasta metlaeng ti Baguio City Police Office Station 10, Bureau of Fire-Tuba, ken Tuba Municipal Disaster and Risk Disaster Management alas-11:02 ti agsapa kalpasan a nakaawat dagitoy iti awag manipud iti Barangay Captain ti Poblacion, Tuba seknan iti maysa a plane crash.
Iti inisyal nga imbestigasyon, agarup 10:38 ti agsapa idi namonitor ti personnel ti Baguio Aerodrome ken Airspance Protection Section babaen iti radio message manipud iti Tower Baguio a napukaw ti komunikasyon dagiti nasao a Philippine Air Force Training flight.
Sigun iti pablaak ti Philippine Airforce, ti nasao nga aircraft ket maysa kadagiti 11 planes a nagdalyasat manipud Fernando Air Base idiay Lipa City paturong iti siudad ti Baguio.
Iti maudi monitoring dagitoy, adda ti nasao nga aircraft iti two Nautical Miles Northwest iti Loakan Airport iti siudad sakbay a napukaw ti komunikasyon dagitoy.
Nangipaay met ti Philippine Air Force ti pannakipagriknada kadagiti pamilya dagiti biktima ken impakaammoda babaen iti statement dagitoy a mannarimaanen ti imbestigasyon seknan iti napasamak a trahedya.
Kanayonanna, nangipaay metlaeng ti mensahe ti PMA “Bagong Sinag” Class of 2024 iti mensahe a pannakipagriknada iti ipupusay ni 2LT CHERKY E EMBUDO PAF kas paset iti nasao a batch ti Philippine Military Academy. //via Bombo Noveh Organo
