Pimmusay dagiti dua a pulis gapu iti napasamak a pammaltog iti uneg ti Provincial Explosive and Canine Unit (PECU) sadiay Bangued, Abra idi Nobyembre 10,2025.
Iti panakiuman ti Bombo Radyo Cauayan kenni PMAJ. Connie Balido, Public Information Officer ti Abra Police Provincial Office, immuna a pinaltugan ti maysa a police lieutenant ti kadua dagitoy a police staff sergeant (PSSg) bayat nga agtotoothbrush iti barracks dagitoy.
Natamaan met iti namin-uppat a daras ti biktima a nangitunda iti ipupusay ti daytoy.
Dagus met a nagturong ti maysa pay a police senior master sergeant (PSMS) iti nakapasamakan ti insidente, ngem mapapati a pinaputukan daytoy ti nasao a lieutenant ngem saan a natamaan.
Bimmales met ti police senior master sergeant a nangitunda iti ipupusay ti lieutenant kalpasan a nagsagrap iti dua a tama ti paltog iti bagina.
Rimmuar iti inisyal nga imbestigasyon a sakbay ti insidente, ket pinaayaban ti regional office ti lieutenant kalpasan a naireklamo daytoy a nakainom iti arak bayat a naka-duty.
Gapu iti dayta, mapapati nga atapen ti lieutenant a ti police staff sergeant ti nangipulong iti nasao a banag a nangitunda iti pamaltog.
Kagiddan dayta, boluntaryo a simmuko ti police senior master sergeant kadagiti otoridad ken possible a mapilaan iti homicide.
Agtultuloy metten ti imbestigasyon ti pulisya tapno maammuan ti pudno a rason ti pammaltog.
