BAGUIO CITY – Impetteng ti chairman ti Committee on Laws iti lokal a konseho ti Baguio ti saanna a panangaprobar iti kiddaw ti RCC Global Entertainment Inc. a mangimuntar ken mangpataray iti electronic ken traditional bingo ken dadduma pay a pasugal nga otorisado ti PAGCOR ditoy siudad.
Sigun kenni Councilor Betty Lourdes Tabanda, awan ti kanayunan a dokumento a mangsuportar iti nasao a kiddaw ti kompanya.
Kinunana a nagbasar laeng ti konseho iti dua a surat ti kompanya ken saandan a nagkiddaw iti kanayunan pay a dokumento.
Gapu iti dayta, impettengna a nasken a matingiting daytoy a naimbag ken nasken nga adda ti maisayangkat a public hearing.
Malaksid iti dayta, naisingasing iti panakaiyuman ti kiddaw iti umno a komiti iti konseho para iti naan-anay a panagadal.
Maipalagip a nagsurat ti maseknan a kompanya iti lokal a konseho ti Baguio tapnu kiddawen ti pammalubos iti panangilukatda iti e-bingo sadiay iti maysa a pasdek sadiay Upper Mabini Street ken sadiay Imelda Village nga inaprobaran met ti siyam a konsehal a nagresulta iti panakaipasa daytoy iti konseho.
Nupay kasta, idi kalman ket imbasura ni Mayor Benjamin Magalong dagiti dua a resolusyon nga impasa ti lokal a konseho a mangkidkiddaw iti panakaipalubos ti operasyon dagiti nasao a kita ti sugal ditoy syudad.
nailanad iti surat ti mayor a mamati daytoy a nasken a magna pay ti kiddaw iti umno a konsultasyon iti publiko.
