Nakkemmeg dagiti dua a suspek a karaman iti pamamatay kenni Misamis Occidental broadcaster a ni Juan “DJ Johnny Walker” Jumalon idi Biyernes
Sigun iti Presidential Task Force on Media Security (PTFoMS) , nabigbig dagiti agkasingsing a suspek a da Boboy Sagaray Bongcawel ken Renante “Inteng” Saja Bongcawel.
Natiliw dagiti nasao a suspek sadiay Barangay Poblacion babaen kadagiti joint operatives ti Calamba ken Sapang Dalaga Municipal Police Stations babaen ti bileg ti arrest of warrant for murder and theft nga inruar ni Calamba Executive Judge Michael Lotao Ajoc ti Regional Trial Court Branch 36, 10th Judicial Region.
Ni Boboy ti nabigbig a nangitutok iti paltog kenni Jumalon, ti katulongan ti nasao a broadcaster iti radio stationna idinto a ni Inteng ti driver ti get-away motorcycle-da.
Iti agdama, ananupen dagiti otoridad ti nabati a suspek a ni Julito “Ricky” Mangumpit ken manamnama a maipaayan ti P3.7 million a gunggona ti siasinuman a makatulong iti pannakatiliw ni Mangumpit.
Maipalagip a napapatay ni Jumalon idi Nobyembre a singko ti napalabas a tawen idiay Calamba, Misamis Occidental bayat ti live broadcastna iti uneg ti pagtaengan daytoy.
