BAGUIO CITY – Impanamnama ti lokal a gobierno ti Baguio City a nainget ti maipatpatungpal dagiti pagalagadan para kadagiti turista manipod Region 1 a sumangbay iti siyudad ti Baguio.
Iti interview ti Bombo Radyo Baguio kenni City Administrator Bonifacion Dela Peña, imbinglayna a sumangpet ti umuna a dua a turista inton bigat kalpasan a nakompleto dagiti kaskenan a requirements dagitoy.
Kinunana a dumanon ita iti 500 dagiti nagrehistro a turista iti VISITA application no sadino 66 kadagitoy ti nakaalan iti travel documents ngem 39 paylaeng ti kumpirmado a sumrek ditoy siudad ita lawas.
Dinakamatna a limitado laeng iti uneg ti lima nga aldaw ti panagbisita dagiti turista ken kanayun a mamonitor ti garawda babaen dagiti travel agency kabayatan ti panagtalinaedda ditoy siudad.
Innayuna a nainget ti implementasion dagiti pagaladagan para kadagiti turista agsipod ta ngumat-ngato paylaeng ti kaso a ti COVID-19 ditoy siudad ti Baguio.
