Imet itan ti kapulisan ti dua kadagiti tallo a persons of interest iti ipupusay ti turista idiay Boracay Island a ni Michaela Mickova, maysa nga Slovak national.
Maipalagip a nasarakan ti awanan iti biag a bagi ti agtawen iti 23 a ni Mickova idi March 12 iti maysa nga abandonado a chapel sadiay Barangay Balabag, Boracay Island nu sadino, awanan daytoy iti undergarment ken natakwatan a nakapasar iti sexual assault kas rimwar iti medico-legal examination daytoy.
Sigun kadagiti maseknan a kameng iti pulisya, nagsagrap ti biktima iti multiple injuries kas iti abrasions ken hematoma iti rupa daytoy, contusions iti abdomen, ken abrasions iti makannawan a takyag ken tumeng daytoy.
Rumrumwar metlaeng iti imbestigayson nga adda ti lalaki a nangimbitar ken Mickova nga uminom iti buko juice sakbay a naipadamag a mapukpukaw daytoy.
Iti agdama, im-imbestigaran dagiti kapulisan nu adda ti pakainaigan ti lalaki a nangimbitar ken ni Mickova kadagiti tallo a persons of interest.
Iti baet iti nasao a krimen, kinuna met ti panakangiwat iti Aklan Provincial Police Office nga agtaltalinaed a natalged ti Boracay Island ken naipanamnama ti panagreggetda para iti linak ken seguridad dagiti agturong sadiay.
