BAGUIO CITY- Napatawanen ti kaskenan a pannusa ti dua nga indibidual a nangipatungpal ti prank calls iti emergency hotline ti Baguio a 911.
Kasaruno daytoy ti panakaipila ti kaso nga unjust vexation kontra kadagitoy babaen iti personnel ti Early Warning and Surveillance Division ti City Mayors Office.
Sigun iti mayor, ad-ado pay a kaso ti manamnama a maipila gaputa manarimaan ti panakabigbig dagiti daduma a prank callers babaen iti systematic tracing ken tagging.
Sigun kenni Felipe Puzon, Executive Officer V ti City Mayors Office, nakaawat ti siudad ti 12,000 a prank calls ken 10,000 a drop calls manipud iti pakabuklan a 31,880 nga awag a naawat ti Baguio 911 sipud nangrugi ti operasion idi Oktobre idi napan a tawen.
Kinunana nga ag-op-operate ti Baguio 911 helpline 24/7 no sadino mabalin a maaccess babaen iti direct telephone calls wenno babaen iti Baguio in my Pocket application.
Balballaagan ti mayor dagiti perpetrators a mapatawanda ti pannusa iti kanito a mabigbig ti kinasiasino dagitoy.
