BAGUIO CITY – Natiliw ti dua nga agkatrabahuan gapu iti panangpekeda kadagiti dokumento nga imparangda iti pulisya tapnu laeng makastrekda iti siudad ti Baguio idi kalman.
Nabigbig dagitoy a da Arvin John Buenaobra, 24-anyos, residente ti Bagong Barrio, Caloocan City ken Victor Sabelao Luchaves, 49-anyos, driver ken residente ti Malabon City.
Maibasar iti report ti pulisya, nakalugan dagiti dua iti maysa a close van nga addaan plaka nga ABR 4797 ken pinara dagitoy dagiti pulis a mangiwanwanwan iti BCPO-Station 9 quarantine checkpoint sadiay Purok 3, Irisan.
Imparang dagiti dua ti medical certificate nga inted ti Rivera Medical Clinic ken resulta ti Rapid Antibody Test manipud iti Parañaque Ultrasound and Diagnostic Center, Inc. idi November 5, 2020.
Nupay kasta, nagduadua dagiti pulis iti kinapudno dagiti dokumento gapu iti kaawan ti dry seal ti issuing clinic.
Naduktalan met iti panagtawagda kadagiti maseknan nga awan ti rekord dagitoy ken saanda nga inted dagiti nasao a dokumento.
Gapu iti daytoy, naiturong da Buenaobra ken Luchaves iti istasyon ti pulisya para iti dokumentasyon.
Sumangsangon dagitoy iti kaso a panagpeke ti dokumento ken panaglabsing iti Republic Act 11332 wenno ti Mandatory Reporting of Notifiable Diseases and Health Events of Public Health Concern Act.
Maibasar iti rekord, dagiti dua ti maika-12 ken maika-13 a tiniliw ti pulisya gapu iti panangiparangda kadagiti peke a dokumento iti gandatda a makastrek ditoy siudad ti Baguio.
