Agtultuloy ita ti panagbantay dagiti awtoridad ti Barangay Irisan, Baguio City gapu iti agtultuloy a panagbayakbak ti tudo gapu iti naglabas a Bagyong Luis.
Iti pannakiuman ti Bombo Radyo kenni Barangay Captain Arthur Diplat Carlos, imbinglayna nga addan ti lima a landslide a naireport iti barangay gapu iti agtultuloy a tudo.
Gapu iti dayta, adda dagiti residente a naapektaran gapu iti panagreggaay ti daga iti sumagmamano a paset ti barangay.
Iti sabali a bangir, patien ni Carlos a nakasursuron dagiti residente mainaig iti panaglayus, gapu ta ammoda a dakkel ti epekto ti basura iti kaada ti layus iti nasao a lugar.
Iti agdama, agtultuloy ti panagmonitor dagiti awtoridad iti nasao a barangay tapno kitaenda ti sitwasyon dagiti nadumaduma a paset ti lugar.
Sigun pay kenkuana, nakalukat ti barangay hall ken dagiti dadduma a religious sectors a mabalin a maaramat kas pagyanan dagiti residente no kasapulan ti panagbakwit.
Nagballaag met ni Carlos kadagiti residente nga agtalinaed a nakasagana, agannad, ken makitinnulongda iti panangmonitor kadagiti lugar a posible a margaay tapno maipakaammo a dagus kadagiti awtoridad ken ma-check dagitoy.// Bombo Khey Reparip
