Pimmusay ti dua bayat a nadangran ti tallo nga indibidual kalpasan a natnag iti rangkis ti nagluganan dagitoy a Jeep idiay Conner, Apayao idi May 26, 2025.
Nabigbig dagiti pimmusay a da Alyas Mike ken Alyas Noli, agpada a hog buyer.
Nadangran met ti driver ken dagiti dua a kadwa dagitoy a residente iti Barangay Andarayan South, Solana, Cagayan.
Maibasar iti imbistigasion dagiti otoridad, pasubli ti nasao a jeep manipud Kabugao, Apayao nga addaan iti karga nga 18 a baboy.
Nupay kasta, naawanan iti preno ti Jeep, partikular iti agpababa ken kurba a paset ti kalsada idiay Barangay Lenneng.
Gapu iti dayta, saan a nakontrol ti driver ti lugan a nangitunda iti pannakatnag daytoy.
Maibasar iti kanayunan a report, dead on the spot dagiti pimmusay gapu iti nakaro a sugat iti paset ti ulo dagitoy bayat a manarimaan ti obserbasion dagiti doktor kadagiti dadduma a biktima.
Sigun kadagiti otoridad, ti nadakamat a paset ti kalsada ket maysa nga accident-prone area.//
