Sumangsango dagiti dua nga star general iti Armed Forces of the Philippines iti reklamo nga attempted rape kalpasan a maatap a ginundawayanda dagiti dua pay a soldado iti kwarto dagitoy kalpasan a nag-iinumda iti arak.
Naimatangan iti CCTV footage dagiti grupo dagiti soldado, pakairamanan dagiti nasao a general a simmangpet iti San Fernando Air Base sadiay Lipa, Batangas iti rabii idi Enero 29, 2025.
Malaksid iti dayta, naimatangan pay iti sabali a video dagiti dua a soldado a rimmuar iti quarter dagiti senior officers dagitoy nga agsangsangit.
Sigun kadagiti nagreklamo, kiniddaw dagiti general a maturogda iti kwarto dagitoy a rason a ditoy metten a napasamak ti maatap a sexual assault.
Pinaglibakan met daytoy ti nasao a general ngem kinuna ti lawyer dagiti complainants a ti rape ket possible metlaeng a mapasamak kadagiti lallaki.
Gapu iti dayta, naipasidong dagitoy iti restrictive custody ti Philippine Air Force.
Maad-adal metten ti nasao a reklamo ken maur-uray laengen ti pirma ni AFP Chief-of-Staff General Romeo Brawner Jr.
Possible met a sumango dagitoy iti kaso iti sidong ti Articles of War 96, wenno ti conduct unbecoming of an officer and a gentleman; ken ti Articles of War 97, wenno ti conduct prejudicial to good order and military discipline.
Impaganetget metlaeng ni AFP spokesperson Colonel Francel Margareth Padilla nga iyemplementarda ti zero tolerance iti aniaman a kapada a banag.
