Dumanon iti dua pulo ket uppat nga indibidual ti pimmusay bayat a sangapulo ket innem met ti mapukpukaw gapu paylaeng iti mapaspasamak nga uram sadiay Los Angeles.
Iti pannakiuman ti Bombo Radyo kenni Delfrado Villanueva Jr., Bombo International News Correspondent sadiay California, United States of America, kinunana a ti kangrunaan a nakaro a mapaspasaran nga uram ket ti Eaton fire ken ti Palisades fire.
Sigun kenkuana, sangapulo ket innem kadagiti pimmusay ket gapu iti Eaton fire bayat a walo met iti Palisades fire.
Malaksid iti dayta, 180,000 nga indibidual ti agtaltalinaed kadagiti evacuation centers, 12, 401 nga structures ti totally damaged ken dadduma pay.
Impettengna metlaeng nga adu dagiti espekulasyon a mapapati a nangrugi ti Palisades fire gapu iti man made bayat a ti Eaton fire met ket mapapati a nangrugi gapu iti mapapati a panagspark ti kuryente.
Dumanon metten iti 18% agingga 20% ti nasebseban iti uram gapu paylaeng iti pannakitinnulong dagiti sumagmamano a lugar manipud Canada, Mexico ken dadduma pay a lugar babaen iti panangipatulodda kadagiti helicopter ken eroplano a maar-aramat a mangsebsebseb iti nasao nga uram.
Gapu iti dayta, kimmalma iti bassit ti nasao nga uram kalpasan a simmardeng ti napigsa nga angin sadiay.
Innayonna metlaeng a naisublin ti suplay ti kuryente kadagiti saan a naapektaran iti uram.
Nupay kasta, saan a paylaeng a naisubli kadagiti dadduma a lugar nangruna dagiti nakaro a makapaspasar iti uram iti agdama.
Iti sabali a bangir, nakasagana metten ti Philippine Consulate sadiay a tumulong kadagiti naapektaran a Pilipino iti nasao nga uram.
Mabalin laeng dagitoy nga umawag iti numero wenno iti hotline dagitoy.
