BAGUIO CITY – Kapapati dagiti ebidensia a naiparang kontra kadagiti maatap a korapsion wenno nga iligal nga aramid ni La Trinidad Zoning Officer Engineer Emerson Tabernero.
Nailanad daytoy iti resolusyon nga inruar ti Civil Service Commission (CSC)-Cordillera kalpasan ti panangimbestigarda iti kaso nga administratibo nga impila ni Councilor Nestor Fongwan Jr. idi April 3 kontra kenni Tabernero.
Maak-akusaran ni Tabernero iti grave misconduct, dishonesty, conduct prejudicial to the best interest of the service ken panaglabsing iti RA 6713 wenno ti Code of Conduct and Ethical Standards for Public Officials and Employees.
Nagbasar ti kaso iti affidavit complaint ni James Benos nga addaan ti lote sadiay Longlong, Puguis bayat a nairaman pay dagiti reklamo ti innem pay nga indibidual a nabigbig a da Architect Wendell Aplaten, Architect Bismark Paran, John Kimpay, Ceasar Juan, Pedro Limog Paredes ken Ambrosio Alawas.
Nailanad kadagiti reklamo a nagkiddaw ni Tabernero iti ‘fees’ wenno kwarta kadakuada para iti panaka-survey ken panaka-iproseso ti loteda ngem awan ti naaw-awatda a dokumento wenno permit.
Impettengda a ti nabayag a panakaiproseso dagiti kasapulanda a dokumento ket nangitunda iti monetary loss ken mental stress kadagitoy.
Maipalagip a dinakamat pay ni Benos nga ar-aramaten ni Tabernero ti nagan ni Fongwan iti panakaitantan ti panakaiproseso ti ap-aplikaranna a permit.
Kabayatanna, iti baet a saan pay a naawat ti Mayor’s Office ti kopya ti resolusyon ti CSC-Cordillera ket agtultuloy latta ti panagawatda kadagiti reklamo dagiti nagbalin a biktima ti zoning officer ti munisipyo.
Ginandat met ti Bombo Baguio nga alaen ti benneg ni Eng. Tabernero ken iti panagturong ti News Team iti opisinana ket awan daytoy gaputa naka-field wenno adda ti as-asikasuenna iti ruar ti opisina.
