Impasigurado ni House Prosecutor ken Bicol Saro Partylist Representative Terry Ridon a nakasaganan ti house prosecution nga ipresenta dagiti iggemda nga ebidensya kontra kenni Vice President Sara Duterte kadagiti sumarsaruno nga alaldaw.
Daytoy ket kalpasan a pormal a nagconvene ti Senado kas Impeachment Court para iti panagkeddeng ti kaso nga impeachment ti bise presidente.
Impasigurado ni Ridon a sumurot ti panel kadagiti amin a direktiba ken legal a proseso nga ituding ti nasao nga impeachment court kabayatan nga agtultulid ti panagkeddeng iti kaso idiay Senado.
Iti sabali a bangir, idagdagadag ti Makabayan Bloc a marugianen inton bigat ti panagkeddeng iti kaso nga impeachment kontra iti bise presidente.
Impetteng da ACT Teachers Representative Antonio Tinio, Gabriela Women’s Party Representative Sarah Jane Elago, ken Kabataan Representative Atty. Renee Louise Co a napateg a konstitusyonal nga addang para iti accountability.
Namnamaen dagitoy nga aramiden ti Senado ti trabaho daytoy nga addaan iti dedikasyon ken napartak a panagaksyon.
Sigun iti Makabayan Bloc, nabayagen a nag-uray dagiti Pilipino iti sungbat kadagiiti seryoso nga alegasyon ti korapsyon ken iregular a panagaramat ti pondo ti gobyerno.
Inyebkas pay dagiti nasao a mammanday-linteg nga agtalinaed a bantayanda ti panagbalin a patas ken transparent iti sibubukel a proseso ti impeachment. //bombokaren.c.s
