BAGUIO CITY – Manarimaan ita ti panagala ti Federation of Jeepney Operators and Drivers Association iti Baguio-Benguet iti datus kadagiti drivers dagiti parapubliko a jeep ditoy Baguio ngem saan a rehistrado a botante ti siudad a posible a nakaro a maapektaran iti panakasuspindir ti panagbiahe dagiti parapubliko a lugan.
Maipalagip a gapu iti Enhanced Community Quarantine gapu iti COVID-19 ket nasuspindir ti panagbiahe dagiti parapubliko a lugan iti entero a Luzon.
Iti interview ti Bombo Radyo Baguio kenni Patricio Evangelista, presidente ti nasao a pederasyon, kinunana a parikut ita dagiti operators dagiti jeep iti siudad no kasano a matulongan dagiti maapektaran a kakadwada a makimanmaneho laeng.
Dinakamatna nga adda dagiti drivers ti jeep a nagtaud iti dadduma a probinsia a makimanmaneho ditoy siudad a posible a nakaro a maapektaran no bumayag ti agdama a sitwasyon.
Kinunana a babaen iti listaan ket maiyasideg dagiti maseknan a drivers iti lokal a gobyerno ken kadagiti ahensia ti gobyerno tapnu maipaayan dagitoy iti tulong kas iti agtaud iti DSWD ken iti Office of the President.
Mangnamnamada met a matulongan to dagiti nasao a mangmangged iti transport sector.
