BAGUIO CITY – Nailaylayon ti Enhanced community quarantine (ECQ) iti intero a munisipio ti Lagawe ken ti uppat a barangay ti Tinoc sadiay Ifugao.
Sigun kenni Governor Jerry Dalipog, inaprobaran ti Regional Inter-Agency Task Force ti kiddaw ni Lagawe Mayor Martin Habawel, Jr. a pannakailaylayon ti ECQ iti ilida.
Kinunana a naaprobaran met laeng ti kiddaw ni Tinoc Mayor Samson Benito nga extension ti ECQ iti uppat a barangay ti Tinoc a pakairamanan ti Ap-apid, Dango, Gumhang ken Luhong.
Sigun iti gobernador, nakiddaw ti extension ti ECQ kadagiti nasao a lugar tapno makontrol ti panaggaraw dagiti residente ken tapno malapdan ti local transmission ti COVID 19.
Sigun iti lokal a gobierno ti Lagawe, masapul a mailaylayon ti ECQ sadiay gapu ta ti munisipio ti sentro ti komersio ti Ifugao ken saan a maliklikan ti panagturong ti adu a tattao sadiay.
Maipalagip a nairekord sadiay Lamut partikular iti barangay Poblacion East ti kaunaan a kaso ti COVID 19 sadiay Ifugao.
