BAGUIO CITY – Naikandado dagiti mosques ditoy siudad tapno maipanamnama nga awan ti asinoman a grupo dagiti Muslim ti agtataripnong kabayatan ti pannakaobserbar ti Ramadan.
Impanamnama daytoy ni National Commission on Muslim Filipinos Director Abel Macarimpas ken ni Benjamin Magalong kasaruno dagiti report nga adda latta dagiti maipatpatungpal a panagtitipon iti dadduma a mosque ditoy siudad iti baet enhanced community quarantine.
Inaklon ni Macarimpas a nakaawat daytoy iti report nga adda ti maysa a grupo dagiti Muslim nga agtitipon para iti panagkararagda.
Nupay kasta, kinunana a dagus a naaksionan ti nasao a pakaseknan ken nanayonan dagiti kandado ti mosque a pagtartaripnongan dagiti Muslim.
Impanamnama pay ni Macarimpas nga amin a dadduma pay a mosque ditoy siudad ket nakarikep manipud pay nangrugi ti ECQ.
