BAGUIO CITY – Temporaryo a palpalubusan dagiti otoridad ti panagparada dagiti pribado a lugan kadagiti espasio a nairanta para kadagiti public utility jeepneys (PUJs) iti merkado publiko ti siudad ti Baguio.
Iti interbyu ti Bombo Radyo Baguio, inlawlawag ni Cyr Bagayao, dadaulo ti Public Order and Safety Division (POSD) a daytoy ket tapno temporario a maaramat dagiti pribado a lugan dagiti paradaan dagiti PUJs.
Nupay kasta, kinunana nga agtultuloy latta ti panagbaklasda iti plaka dagiti lugan a naiparada kadagiti saan nga umno a lugar ken kadagiti nabayag unayen a nakaparada.
Inlawlawagna a maysa daytoy a wagas tapno maupay dagiti umili a rumuar iti babbalayda.
Kabayatanna, dinakamat pay ni Bagayao a nainget nga imonmonitorda ti polisia a “one person per household” laeng ti mapalubusan nga agturong iti merkado tapno apan gumatang iti masapul dagitoy.
Kinunana a no makakita dagiti POSD enforcers kadagiti tattao nga agkadkadwa nga apan agpalengke ket bagbagaanda dagitoy.
Mainaig iti daytoy, binalakadan ni Bagayao dagiti vendors iti merkado a pagtalinaedenda ti social distancing ken proper hygiene.
