BAGUIO CITY – Agtultuloy ti panangtulong ti Department of Tourism (DOT)-Cordillera kadagiti turista a na-stranded iti nagduduma a paset ti rehion gapu iti enhanced community quarantine (ECQ).
Iti interbyu ti Bombo Radyo ken ni Jovi Ganongan, OIC-Regional Director ti DOT-Cordillera, kinunana nga adda ti 109 a foreign tourists a na-stranded ditoy Cordillera gapu iti ECQ.
Kinunana a nakaawiden ti 56 kadagitoy bayat nga adda pay ditoy rehion ti 53 kadagitoy.
Dinakamatna a sabali pay dagiti estudiante a na-estranded ditoy siudad ngem kaaduan kadagitoy ket nakaawid metten.
Kinunana a konkontaken-da dagiti turista no adda ti maipatungpal a repatriation tapno makaawid dagitoy.
Inaklon ni Ganongan a parikot ita ti panang-kontak-da kadagiti turista nga agnanaed kadagiti kabagianda.
Kinunana a nalaklaka a ma-kontak dagiti turista a na-stranded kadagiti hotels ken dadduma pay nga akomodasion.
Iti baet daytoy, agyamyaman ni Ganongan gapu ta saan unay a nangato ti bilang dagiti turista a na-stranded ditoy rehion gapu ta immunan a nalimitaran dagiti tourism activities sakbay pay ti ECQ.
