BAGUIO CITY – Tut-tutukan ita ti lokal a gobyerno ti La Trinidad, Benguet dagiti vegetable trading areas sadiay kas iti La Trinidad Vegetable Trading Post, Benguet Agri-Pinoy Trading Center ken dagiti pribado a trading facilities iti kampanya kontra iti panagwaras ti COVID-19.
Iti interview ti Bombo Radyo Baguio kenni La Trinidad Mayor Romeo Salda, kinunana a daytoy ket gaputa nakitaanda iti saan a panakasurot ti pagalagadan a social distancing kadagiti nasao a pasilidad.
Dinakamatna a nangipaayda iti baro nga ID iti La Trinidad Vegetable Trading Post tapnu masimpa ti panag-uneg dagiti tattao sadiay ken sakbay a makastrek dagiti tattao ket maipasidong dagitoy iti thermal scanning ken agpigadda iti lupot nga addaan ti disinfectant.
Innayonna a ma-disinfect met dagiti pilid dagiti lugan a sumrek kadagiti trading facilities.
Sigun pay kenni Mayor Salda, tunggal aldaw ti Dominggo ket maisaysayangkat ti panag-disinfection kadagiti trading areas sadiay La Trinidad, pakairamanan ti merkado publiko ken kadagiti mapalpalubusan nga aglukat nga establishimento.
