BAGUIO CITY – Nauram ti maysa a pagadalan ti elementarya sadiay Tuba, Benguet kagiddan ti panakarambak ti Labor Day.
Iti panakiyuman ti Bombo Radyo kenni Police Major James Acod, hepe ti Tuba Municipal Police Station, kinunana a nangrugi ti uram iti principal’s office ti Indaoac Elementary School sadiay Tabaan Sur, Tuba, Benguet.
Kinunana a gapu iti napartak a panagkayamkam ti apoy ket nairaman dagiti silid-pagadalan a kaabay ti nasao nga opisina agingga a nauram met dagiti dadduma pay a silid-pagadalan sadiay.
Innayonna a naan-anay a nauram ti principal’s office ken ti innem a silid-pagadalan ti Indaoac Elementary School gaputa naaramid dagitoy iti light materials.
Nauram pay dagiti napapateg a papeles ken dokumento ti nasao a pagadalan.
Agtultuloy met ti imbestigasyon dagiti bombero tapnu maamuan ti nagtaudan ti nasao nga uram.
