Indauloan ni Mayor Benjamin Magalong,Chairman ti Cordillera Regional Peace and Order Council (CRPOC) ti emergency meeting sadiay Camp Villamor, Calala, Bangued, Abra ita nga aldaw.
Daytoy ket tapno marisut dagiti pakaseknan sadiay Abra nangruna ti maipapan iti linak ken kappia.
Iti panakiuman ti Bombo Radyo kenni Mayor Magalong, kinunana a saan a mailibak a kagiddan ti election period ket immado dagiti shooting incidents iti nasao a probinsia.
Gapu iti dayta, sumagmamano nga indibidual ket maal-alarma.
Sigun iti mayor, ti panagtataripnong dagitoy ket tapno mapagtalantananda no kasapulan kadi a maideklara dagiti sumagmamano a paset ti Abra kas COMELEC control.
Naimbitaran met iti daytoy ni Atty. Julius Torres, Regional Director ti Commission on Elections-Cordillera, tapno pagsaritaanda dagiti election-related violence.
Kabayatanna, naituding a makisinnarak ti Regional Peace and Order Council Executive Committee kadagiti kandidato iti umadanin nga eleksyon tapno maipasigurado ti “commitment” dagitoy a naannayas ti panakaipatungpal ti eleksyon iti nasao a lugar.
