Mannarimaan itan ti pannakapasayaat ti bukod nga emergency operation center ti Munisipyo ti La Trinidad .
Tapno adadda a mapasayaat, bimmisita ni La Trinidad Mayor Roderick Awingan kadua ni Administrator Atty. Franco Bawang, Jr., Municipal Disaster Risk Reduction and Management Officer Yoshio Labi, ken La Trinidad Municipal Police Station Chief Lt. Col. Zacarias Dausen iti Smart City Command Center ti siudad ti Baguio itay kanikadua.
Inlawlawag met ni John Carlo Erpelo, Technical Team Leader ti Smart City Command Center dagiti opisyales ti La Trinidad kadagiti sistema iti uneg ti command center.
Maipalagip a nag-operate ti Baguio Smart City Convergence command center idi Setiembre 2021 tapno mapapigsa pay ti public safety, traffic, ken serbisyo ti lokal a gobyerno ti siudad babaen iti artificial intelligence.
Impetteng ni Mayor Awingan mannarimaan metten ti pannakaupgrade ti emergency operation center ti La Trinidad a masarakan idiay 4th floor ti MDRRM office, no sadino mannarimaan ti proseso ti procurement dagiti kanayunan a CCTV cameras ken sistema para iti kangrunaan a kalsada ken agserserbi kas benchmark dagitoy ti command center ti siudad ti Baguio.
