BAGUIO CITY-Malamlamayan ita ti maysa nga empleyado ti provincial government ti Apayao kalpasan a pimmusay idi naidungpar ti naglulugananna a motorsiklo iti maysa metlaeng a motorsiklo iti national highway sadiay Capannikian, Pudtol, Apayao idi kanikadua.
Nabigbig daytoy a ni Federico Llameg Alonzo, 54-anyos, naasawaan, empleyado ti Apayao Provincial Capitol ken residente ti Pisong, Swan, Pudtol, Apayao.
Maibasar iti report, daldalyasaten ni Alonzo ti kalsada babaen iti motorsiklo nga addaan side car ngem awanan ti silaw paturong iti Poblacion, Pudtol idi aksidente a nakabanggana ti motorsiklo a nagtaud iti bangir a direksion nga imanmaneho met ni Robert Candiya Oraye, 37-anyos, naasawaan, driver ken residente ti Swan, Pudtol, Apayao.
Agpada a naiturong dagiti dua iti Amma Jadsac District Hospital ngem naideklara a dead on arrival ti biktima a ni Alonzo bayat a naiyakar met ni Oraye iti Far North General Hospital sadiay Luna, Apayao para iti kanayonan a medikasyon.
Naamuan nga agpada a nakainom iti arak dagiti dua nga indibidual
