Nagpalagip ti Department of Labor and Employment kadagiti employers a siguraduenda a protektado dagiti trabahadorda, manipud iti nakaro a kinabara gapu iti El Niño phenomenon.
Sigun kenni Bienvenido Laguesma, Secretary ti Labor and Employment, nangiruaren ti Department of Employment ti Labor Advisory idi napalabas a tawen, a mangipalagip kadagiti employers a sukimatenda dagiti pagtrabahuan dagiti empleyadoda ken ipatungpalda dagiti addang a mangikkat iti aniaman a peggad iti salun-at dagiti empleyado.
Karaman kadagiti addang a mabalin nga ipatungpal dagiti employer ti nasaysayaat a ventilation, pakairamanan dagiti AC unit iti manufacturing zones ken ti libre a danum, tapno agtalinaed a hydrated dagiti empleyado.
Malaksid iti dayta, binalakadan ti gobyerno dagiti employers nga i-adjustda ti break hours dagiti empleyado, tapno masigurado saan a makapasar dagitoy ti nakaro a kinabara bayat ti kapudotan a paset ti aldaw, agsipudta mabalin a mangitunda daytoy iti work-related illnesses ken injuries.
Sigun kenni Laguesma, mabalin a maipasango iti administrative, civil wenno criminal charges dagiti employers a saan a mangipaay iti natalged nga aglawlaw ti pagtrabahuan para kadagiti empleadoda, maibasar kadagiti agdama a labor laws.
