Pinatibker ken pinabileg ti Baguio City Jail–Male Dormitory ti environmental partnership dagitoy iti Mt. Ulap.
Daytoy ket kalpasan ti panakapirma ti memorandum of agreement (MOA) iti nagbaetan ti nasao nga opisina nga indaulaon ti City Jail Warden a ni JCINSP Atty. Dexter B. Ngipol, ken ti Barangay Ampucao, Itogon, Benguet babaen kenni Barangay Chairman Freddie S. Altiga.
Ti panakapirma ti nasao a katulagan ket inimatangan da JINSP Rolando N. Diwas, JINSP Jerry M. Tengay ken daduma pay nga opisyales ti Barangay Ampucao.
Daytoy ti mangmarka iti pormal a partnership dagiti dua a maseknan iti commitment dagitoy nga aywanan ken pasayaaten ti Mt.Ulap.
Manamnama met ti Picking Litter While Walking activities (PLALKING) iti tunggal kwarter iti tawen.
Malaksid iti dayta ket maipatungpal metlaeng ti tree planting iti tunggal ngudo ti Hunyo ken Disyembre.
Mainaig iti dayta, impettengda a ti nasao nga aktibidad ket saan laeng a para iti panakasalaknib ken panakapreserba dagiti ecological areas iti rehion nu di ket maysa metlaeng daytoy a wagas tapno maitandudo ti wellness, camaraderie ken social responsibility dagiti makipaset a personnel.
Kabayatanna, daytoy ti kaunaan a panakipinnirma ti BJMP Male Dormitory kadagiti tourist destination kas iti Mt. Ulap nu sadino, pinagyamananda ti suporta iti Barangay Ampucao.
Nupay kasta, ikonkonsidera ti nasao nga opisina ti panakitinnulongda iti sabali pay para iti pagimbigan ken mangnamnama iti sustained collaboration para iti environmental ken community development programs.//Bombo Noveh Organo
