BAGUIO CITY – Adalen ti Regional Tripartite Wage and Productivity Board – Cordillera ti agbalin nga epekto ti baro a tax reform law kadagiti umili iti rehion.
Impanamnama daytoy ni RTWPB-Cordillera Board Secretary Augusto Aquillio kagiddan ti manamnama nga implementasyon ti Tax Reform for Acceleration and Inclusion (TRAIN) Law.
Kinunana a sukimatenda ti epekto ti TRAIN Law nangruna kadagiti minimum wage earners iti Cordillera.
Sigun kenkuana, manamnama a dakkel ti epekto ti nasao a linteg iti panaggaraw ti presyo dagiti kangrunaan a gagatangen ken serbisyo iti lokalidad.
Innayonna a ditoy nga agdesisyonda no kasapulan manen a maipaipangato ti minimum wage dagiti mangmangged iti pribado a sektor.
Dinakamatna pay a posible a makaipaayda iti inisyal a resulta ti nasao a panagadal kalpasan ti tallo a bulan.
