Sisusuporta ti pagilian nga Estados Unidos iti pannakaipasa ti Philippine Maritime Zones Act a mangipakpakaammo iti territoryo ti pagilian.
Maipalagip a pinirmaan ni President Ferdinand Marcos Jr. ti Republic Act 12064 wenno ti Philippine Maritime Zones Act idi kalman kas panangpatibker ti Pilipinas iti entitlement wenno titulo daytoy kasta met ti responsibilidadna kadagiti nagduduma a maritime zones.
Iti Maritime Zones Act, nabigbig dagiti internal waters ti pagilian kasta met dagiti archipelagic waters, territorial sea, contiguous zone, exclusive economic zone, ken continental shelf a nakalinya iti 1982 Law of the Sea Convention ken ti 2016 Arbitral Tribunal ruling.
Malaksid iti Maritime Zones Act, napirmaan met laeng ti Republic Act 12065 wenno ti Philippine Archipelagic Sea Lanes Act nga addaan panggep nga agserbi kas pagannurutan dagiti ganganaet a barko ken aircrafts.
