Nakipaset ti sumagmamano nga estudiante iti unibersidad ken grupo iti protesta a ‘Black Friday’ nga inorganisar ti Gabriela Women’s Party ken dadduma pay nga advocacy groups, a mangaw-awag iti pannakakonbiktar ni sigud a Presidente Rodrigo Duterte a sumangsango kadagiti krimen kontra iti sangatauan iti sanguanan ti International Criminal Court.
Napasamak ti protesta iti igid ti Katipunan Avenue idiay Quezon City, babaen panangawagda ti hustisia manipud kadagiti napukawan iti ay-ayaten gapu iti deadly war on drugs ti sigud a presidente.
Idiay met Manila, naguummong dagiti aktibista nga estudiante a Lasallian ken kabagian dagiti biktima ti extrajudicial killings iti Teresa Yuchengco Grounds ket nagmartsada iti uneg ti kampus ti De La Salle University.
Kabayatanna, naguummong met dadakkel a grupo iti nagduduma a siudad tapno ipakitada ti suporta kenni sigud a President Duterte.
Dagitoy ket manipod kadagiti siudad ti Kidapawan agingga iti Butuan, Malaybalay, ken Valencia City iti Bukidnon, ken naguummong metlaeng dagiti bunggoy tapno mangidaton kadagiti kanta ken mangsindi kadagiti kandila kas pammadayaw iti sigud a presidente.
Nakipaset metlaeng dagiti mangsupsuporta a sigud a chief executive iti sumagmamano a siudad ti Visayas, pakairamanan dagiti adda iti Cebu, Bohol, Siquijor, Dumaguete, ken Guihulngan, agraman ti Sogod iti Southern Leyte.
