BAGUIO CITY – Pimmusay ti maysa nga estudyante ti Ifugao State University nga immunan a naipadamag a mapukpukaw.
Nabigbig daytoy a ni Dimas Diaz a residente ti Nayon, Lamut, Ifugao.
Sigun iti Kiangan Municipal Police Station, nakaawatda iti awag seknan iti nasarakan a motorsiklo iti waig iti baba ti maysa a lodge sadiay Ulo, Kiangan, Ifugao.
Mapapati a ti motorsiklo ket tagikua ti mapukpukaw nga estudyante.
Nagturong met dagiti pulis iti pagtaengan da Diaz ngem ditoy a naamuanda a saan pay a nakaawid daytoy ken naudi a nakita daytoy idi malem ti Lunes, August 5.
Nagsubli dagitoy iti nakasarakan ti motorsiklo ken iti panagsawar dagiti pulis ket nasarakanda ti bagi ni Diaz iti ayan ti waig nga asideg iti nakasarakan ti nasao a motorsiklo.
Patien met dagiti pulis a naiyanod ni Diaz iti waig a nakatnagan ti motorsiklo daytoy.
