Awan asi a nirames dagiti lima a lallaki ti maysa a senior high school student idiay Timako, Kalanganan 2, Cotabato City.
Iti report ti Star FM Cotabato, nabigbig ti biktima a ni alyas Patricia bayat a saan pay a nabigbig dagiti lima a suspek.
Maibasar iti imbestigasyon, sumrek koma ti biktima iti pagadalan idi agsapa ti Hulyo 30, nu sadino naglugan daytoy iti striker a payong-payong tapno dagus a makasangpet iti pagadalanda idiay Barangay Datu Balabaran.
Nupay kasta, bayat nga agdaldalyasat iti kalsada, nasdaaw ti biktima gapu ta imbes nga ibaba daytoy ti naglugananna iti pagadalanda ket induretso ti driver paturong idiay Timako, Kalanganan 2, Cotabato City.
Saan a nakapukkaw ti biktima ken nakadawat iti tulong gapu ta tinutukan daytoy ti maysa a lalaki a kadwa metlaeng ti driver ti payong-payong.
Idi nakadanunda iti nasao a lugar, adda ti nangisit a van ken adda ti tallo a lallaki a nakalugan.
Ditoy a pinainomda ti biktima iti danum a mapapati nga adda sabidongna rason a napukaw ti puot ti biktima ken ditoy metten a napasamak ti krimen.
Nakaawid ti biktima iti pagtaenganda iti isu metlaeng nga aldaw.
Dagus met nga inreport ti pamilyana ti napasamak nga insidente kadagiti otoridad.
Iti agdama ket saan pay nga agadal ti biktima gapu ta manarimaan ti panagrekoberna manipud iti trauma a napasaranna.
Kidkiddawen met ita ti pamilya ti hustisya tapno mapasungbat iti linteg dagiti suspek.
