BAGUIO CITY – Parikot ita ti panagsakit ti adu nga ubbing a naibakwit iti sumagmamano nga evacuation centers sadiay Iligan City gapu pay laeng iti mapaspasamak a riribok sadiay Marawi City.
Iti panakiuman ti Bombo Radyo kenni Rashdi Guru nga agdama nga adda iti evacuation center sadiay Iligan City, kinunana nga adu ti ubbing nga agsaksakit sadiay gapu iti nalaus a kinabara ti panawen, aglilinetlet dagiti evacuees ken agkurkurangda iti nadalus a danum.
Kinunana a tunggal agtudo ket malaylayosda nga ad-adda a mangituntunda iti panagsakit dagiti ubbing.
Dinakamatna met a nainayun kadagiti evacuees ti agarup duagasut a naispal a residente idi kalman.
Kinunana met nga amanganta dumanon pay iti makabulan sakbay a makasublida iti balayda sadiay Marawi City.
Innayunna a saanna nga ammo ti sumaruno nga addangna tapnu bumangon manen ken ti napateg manen ket makasubli daytoy iti balayda iti nasao a siudad.
