Kinumpirmar ti Bureau of Immigration (BI) a nakasangpeten ni sigud a DPWH Secretary Manuel Bonoan iti pagilian.
Innayon pay ti Bureau of Immigration nga awan ti asinoman a kadua ni Bonoan a simmangpet.
Sigun kenni Bureau of Immigration Commissioner Joel Anthony Viado, apaman a naalada ti impormasyon, impakaammoda a dagus ti isasangpet ti sigud a DPWH Secretary kenni Acting Justice Secretary Fredderick Vida.
Maipalagip a nailista ni Bonoan iti Bureau of Immigration Lookout Bulletin Order (LBO) kalpasan a nangiruar ti Department of Justice (DOJ) ti direktiba nga imonitor ti travel record kabayatan iti imbestigasyon iti naanomalyaan a flood control projects.
Nupay kasta, saan a mabalin a maipawil dagiti adda iti listaan iti Lookout Bulletin Order isu’t gapunna a nakaruar ni Bonoan iti pagilian idi Nobyember idi napalabas a tawen.
Inlawlawag met ti Department of Justice a rimmuar ni Bonoan iti pagilian tapno kadwaanna ti asawana nga agpataming idiay Estados Unidos.//kcs
