“Excavation” ti maatap a maysa kadagiti kontributor ti panaglayos ti pitak idiay Purok 8, Balenben, Irisan, Baguio City ala-sais ti rabii itay kanikadua gapu iti napigsa a tudo.
Iti pannakiuman ti Bombo Radyo Baguio iti maysa kadagiti residente idiay, dagiti daga a kinali dagiti indibiduwal nga adda iti ngatuen a paset ti naapektaran a balay ket naigabot iti sumagmamano a paset ti pagpagnaan ti danum.
Sigun met kenni Arthur Carlos, Barangay Chairman ti Irisan, Baguio City, daytoy metlaeng ti naiyuman kenkuana no sadino nadakamat a naguyod dagiti gabur gapu iti kinapigsa ti danum a nangitunda iti layos kadagiti babbalay nga adda iti baba.
Inlawlawag dagitoy a napullatan ti kanal gapu iti volume ti pitak wenno daga a naiyanod.
Gapu iti pannakapullat daytoy, nalayos ti pitak ti dua a balay bayat a partially affected ti maysa pay a balay iti babaen daytoy.
Nakumpirmar metlaeng a dumanon iti tallo a pamilya a buklen ti sangapulo ket uppat nga indibidual ti naapektaran gapu iti napasamak a panaglayos ti pitak. //Bombo Noveh Organo
