BAGUIO CITY – Maisayangkat ti experimental traffic scheme iti deppaar ti Naguilian Road a mangrugi iti junction ti Bokawkan Road agingga iti interseksyon ti Dominican Hill Road inton Lunes, December 23.
Iti panakiyuman ti Bombo Radyo kenni PMajor Oliver Panabang, dadaulo ti Traffic Enforcement Unit ti Baguio City Police Office, inlawlawagna a short-term solution ti aramiden dagitoy iti traffic scheme.
Kinunana a kissayanda laeng ti parikot iti nailet a trapiko iti nasao a kalsada.
Dinakamatna nga adda dagiti signages a maaramid ken maimuntar iti maseknan a disso ti kalsada tapnu adda ti suruten dagiti motorista.
Maksayan dagiti left-turn conflicts kas iti panagdalyasat dagiti motorista kabayatan ti rush hours sadiay Naguilian Road paturong sadiay St. Vincent Church ken no left turn manipod Naguilian Road paapan iti Ferguson Road.
Maimplementar met ti one way traffic flow ken two way traffic flow kadagiti kalsada iti Quezon Hill Road, Dominican Hill Road, San Roque Road, Artiaga Street ken dadduma pay.
Innayon ni Panabang a naisingasing ti panakaidenden dagiti poste ti traffic lights tapnu lumawa ti nasao a lane tapnu makagaraw dagiti lugan iti inbound lane ken outbound lane iti Naguilian Road ken Bokawkan Road.
