Inwaragawag ti Presidential Communications Office (PCO) ita nga aldaw a mangdutokda iti fact-check officers kadagiti government media offices, kas paset ti panagreggetda a mangparmek iti fake news.
Sigun kenni Presidential Communications Office (PCO) Secretary Cesar Chavez, mangitundingda iti fact-check officer tapno saanda nga agbalin nga instrumento ken mangitandudo iti fake news.
Innayon ti nasao nga opisial, a paset daytoy nga addang ti panangawis kadagiti media outlets para iti panagtitinnulong tapno masukimat dagiti proyekto ti gobierno.
Ti pannakadutok dagiti fact-check officers ket saklawen dagiti regional ken provincial state media outlets, pakairamanan ti Philippine News Agency, Philippine Information Agency, PTV4, ken Intercontinental Broadcasting Corporation.
Maipalagip a nagwaras idi Abril ita a tawen, dagiti deepfake audios a pakairamanan ni President Ferdinand “Bongbong” Marcos Jr., no sadino mapapati a mangaw-awag iti panagtignay ti militar iti baet ti kumarkaro a tension iti West Philippine Sea.
Malaksid iti dayta, nagbalin a kangrunaan a pakaseknan pay ti fake news idi 2022 elections.
