Nakemmeg ti maysa a lalaki, alyas “Tagalog,” agtawen iti 39, ken maysa a farm caretaker, babaen iti buy-bust operation a naisayangkat sadiay Kahadong, Caponga, Tublay, Benguet idi kalman, Oktobre 3, 2026.
Nakumpiskar manipud iti suspek ti maysa a heat-sealed transparent plastic sachet a naglaon iti puraw a crystalline substance a maatap a shabu ken addaan iti estimated weight a 0.48 a gramo.
Nakumpiskar metlaeng manipud kenkuana ti maysa a one-thousand-peso bill, maysa a cellphone, maysa a Honda Click 125 agraman iti top box, ken maysa nga helmet.
Balligi ti nasao nga operasyon babaen iti panangidaulo ti Tublay Municipal Police Station ken sumagmamano nga unit iti PNP kas paset ti kampanya da kontra iti ilegal a droga.
Iti agdama, addan iti sidung dagiti otoridad ti suspek ken sumangsango iti kaso a pananglabsing iti Republic Act 9165 wenno Comprehensive Dangerous Drugs Act of 2002.
Agpalpalagip met ti pulisya iti publiko a saan a sumrek iti aniaman a klase iti aktibidad mainaig iti ilegal a droga kasta metten a nagballaagda kadagiti amin nga aglablabsing iti linteg nga adda iti kaso a maiyanatup a maipila kontra kadakuada. // via Bombo Khey Reparip
