BAGUIO CIT – Nangrugin ti feasibility study para iti full rehabilitation and maintenance ti Kennon Road nga addaan kaatiddog a 33.534 kilometers a mangkonkonektar iti Baguio-Benguet ken iti Rosario, La Union.
Kasaruno daytoy ti panangpirma ni Presidente Rodrigo Duterte iti Republic Act No. 11604 a mangimanmandato iti panangisayangkat ti Department of Public Works and Highways (DPWH) iti panakapapintas ken panakamintinir ti nasao a kalsada.
Sigun kenni DPWH-Cordillera Regional Director Engr. Khadaffy Tanggol, ad-adalenda ita ti engineering design ti kalsada tapno makita no kasano a mapagbalin a naan-anay nga ‘all-weather road’.
Kinunana a no malpas ti technical ken feasibility study iti Kennon Road ket maamuanda no anya dagiti nasken a maaramid ken ti magastos a pondo para iti rehabilitasyon ti nasao a kalsada.
Dinakamatna a no agbalin nga ‘all-weather road’ ti Kennon Road ket maluktan daytoy iti 24/7 ken saanen a mairikep tunggal adda ti napigsa a panagtudo.
Inaklonna met a posible a dumanon iti lima a tawen ti rehabilitasyon ti Kennon Road iti kanito a marugyan ti patrabaho.
Innayonna a konsultaen pay ti DPWH-Cordillera dagiti lokal a gobyerno ti baguio ken Benguet mainaig iti rehabilitasyon ti Kennon Road.
Maipalagip nga iti inspeksion ti Joint Task Force Kennon ket nabigbig ti 21 a critical sections ti Kennon Road a mairaman to kadagiti kangrunaan a maipangruna iti full rehabilitation.
Sigun kenni Engr. Tanggol, manarimaan metlaeng ti patrabaho ti DPWH-CAR kadagiti disso sadiay a nadadael gapu iti panagreggaay bayat a dagiti dadduma ket nalpasen.
Sagudayen ti baro a linteg a ti DPWH ti responsable iti panakamintinir ti Kennon Road ken iti panakaipasigurado nga agtalinaed a natalged daytoy ken mabalin a pagnaan dagiti motorista.
