Nirambakan dagiti kakabsat a Muslim ti Eid Al-Adha wenno Feast of the Sacrifice ita nga aldaw bayat a manamnama nga agleppas daytoy a piyesta inton Miyerkules.
Iti panakiuman ti Bombo Radyo kenni Imam Shams Maba Monib, Presidente ti Baguio – Benguet Muslim Associations, malagip ti panangipalubos ni Abraham nga isakripisyo ti anakna a lalaki a ni Ismael kas panangipakitana iti panagsurotna ti pagayatan ti Dios ita nga aldaw ti Feast of the Sacrifice.
Sigun kenni Monib, ita nga Eidl Adha ket panawen tapno agidatonda wenno mangidonarda iti maysa wenno dua nga ayup nu kabaelanda kas iti kalding nga addaan iti innem a bulan, baka nga addaan ti dua a tawen ken kamelyo nga addaan ti tallo a tawen.
Dagiti nasao nga ayup ket maited kadagiti amin a makaawat iti nasao a grasya.
Kinuna ni Monib nga ita nga aldaw ket agturongda sadiay Pangasinan nu sadino sadiay nga agparteda ti tallo a baka.
Kabayatanna, kararag dagiti kakabsat ita nga aldaw ti Feast of Sacrifice ti kappia iti intero a lubong tapno maliklikan ti anyaman a peggad wenno didigra ken tapno tunggal maysa ket sumayaat ti panagbiagna.
Agarup 30 met a katao ti nagturong ita a tawen sadiay Mecca kas paset ti nasao nga okasyon.
Nupay kasta, dagiti laeng adda kabaelanna ti obligado nga agturong iti daytoy.//Bombo Mera Pacpacan
